浪子回头-区君祥

唉 势唔估到我呢个光棍王，都要折堕到浸筲箕、训草皮、褛草席、冚雨尾 唉，好心啦大姑，师奶，可怜下呢个乞儿仔，施舍个发财钱啦，好心啦大姑 唉都无人睬我，真系惨咯 —— 往事不堪回首咯 提起就眼泪难收 皆因我，我自小呢，生错咗个念头，我有书都唔读，走去做扒手，走去打荷包，抢手袋，又去爆格，把嘢来偷 呢种犯法嘅行为，真系罪咎，神憎鬼厌，正式贱格又下流 趁埋三五成群，终日好闲游手，到处无端去生事，的确令人嬲，嫖赌饮吹样样齐，坏到无药可救，走去打家劫舍，十足好似一只蛮牛，如此无法无天，真系菩萨都唔庇佑 点解有好人都唔做，偏去做无赖地痞，又话揾食要争地盘，兼且时常仲打打斗斗，搞到你争我夺，斩斩杀杀、斩得血肉横流，所谓做惯乞儿就懒做官，做惯贼都好难收手嘅 有次果然、果然就撞大板，以为有条大腩食正个鱼钩 我仲擒擒青埋牙，一于向佢来郁手涡 哈 我以为佢系老衬遮，点知佢系鳄鱼头 好比秀才遇到老虎，真系吟诗都难脱走涡 哎呀 原来嗰个系差佬 （阿SIR嚟嗰涡 ）佢仲把我来“周” ，哎呀佢将我拉到去差房，惨咯 俾班老爷“湿”、就“湿”到我漏 令我真难受咯 佢打完我一镬，（金嘅 ） 仲要把我扣留，将我困在监房，真系精人都俾佢困到牛咯 不知何时“出册”呢 的确令我担忧 最弊就系烟瘾起，有得食就精神，无得食真系惨过死老窦啊 啲眼泪口水鼻涕都一齐流 餐餐冷饭稀粥，嗰啲油水好似唔啊唔多够涡 弊喇好似水土不服，屙呕肚痛呢肠胃又难受 呢趟我束手无谋，唯有望神仙将我打救 朝朝晚晚都只有暗泪流 点知有个老年、老年嘅监躉，佢走来就将我问候涡——“喂、靓仔啊 你个死靓仔，我问你死过未架吓 ”仲要踢我入会把我来收 原来嗰个系大老千，（“叔父”嚟架呢个 ），佢个花名就叫做“沙皮狗”涡 仲话要将啲功夫仔把我传授呢咁话涡， 收我做“门生”，教我啲骗术，出监之后转咗地头，改转个派头，嗰阵我就充富有，走去四围“吼”，呢我专呃嗰啲阔少，少奶小姐与及嗰啲社会名流 岂料上得山多难免遇着猛兽，估话鹧鸪就容易揿遮，点知揿错嗰只大斑鸠 俾佢识穿咗我啲“噱头”，要我当场就出丑咯，惊动差人，将我拘捕，又身作咗囚 （唉，又衰多次 ）唉我在狱中服刑，捱到我皮黄骨又瘦咯，我好比笼中之鸟，好比一只受制嘅马骝 呢种铁窗风味，我都捱到透咯 经过几番寒暑，岁月悠悠，监禁满期，个名誉臭咯 全无生计，逼住褛席揸兜 享过咁耐风流，折堕真系难啊难抵受 晚晚枕住个筲箕哩、冚住张草席就训咯，俾啲雾水淋头 想我一生作歹为非，皆由我误交损友，致令身败名裂啊，如今咁落魄咁兜踎(褛忧） 我决意回头，向光明路走啊 真系顽石也点头咯，正是千金难买、难买浪子回头 我奉劝世间青少年朋友、接受良好嘅教育，个个品学兼优，我又祝社会繁荣，多丰阜，人人增添福寿，共享升平盛世，大众快乐无愁